مطالب بوقف الاحتفال بالعيد الوطني الكندى بسبب اكتشاف مقابر للسكان الأصليين

 

الوكالة الكندية للانباء

(sara khorshid)

جاء هذا المقال أو بمعنى آخر هذة الكتابات على صفحة (sara khorshid)  دكتوراه فى التاريخ  من جامعة وسترن التى ذكرت  تحليل منطقى حول حادثة اكتشاف مقابر للسكان الأصليين حيث ذكرت  حول الرسومات على كنيسة كاثوليكية فى مقاطعة ساسكاتشوان فى كندا. الجرافيتى بيقول "كنا أطفال" بلون الدم، اتكتب من يومين بعد العثور على مقبرة جماعية جديدة مكان أحد المدارس الكاثوليكية الداخلية للسكان الأصليين، تعبيرا عن الغضب والحزن على الأطفال اللى ماتوا، مئات المقابر اللى معلهاش أسماء وبيعتقد ان أغلب اللى مدفونين فيها أطفال ماتوا فى المدارس دى نتيجة للاهمال و المعاملة القاسية والعنصرية ضد الأطفال أبناء السكان الأصليين من قبل المدرسين والراهبات البيض ونتيجة سوء تغذية وسوء نضافة أدى لأوبئة الخ. فى مدارس كانوا بيتاخدوا من أهاليهم عنوة عشان يدخلوها بدعوى ان أهاليهم أقل تحضرا ومش أهل لتربيتهم

-دى ثانى مقبرة تكتشفها أمم/مجموعات السكان الأصليين لأبناءهم فى الأسابيع اللى فاتت فقط ويعتقد انه الاكتشافات هتتوالى لأعداد أكبر من الأطفال فى الأسابيع والشهور القادمة مع الاستمرار فى البحث من قبل قادة شعوب ومجموعات السكان الأصليين

-فيه دعاوى لعدم الاحتفال السنة دى بعيد كندا القومي (عيد تأسيس دولة كندا) فى أول يوليو زى كل سنة تعبيرا عن احترام مشاعر السكان الأصليين خاصة ان تأسيس كندا ١٨٦٧ كان مرحلة جديدة فى استعمارهم. عيب تترفع الأعلام الأبيض فى احمر (اللى متنكسة حاليا فوق المبانى الحكومية) وهم فى حداد. بس المحافظين شايفين ده "راديكالية" ومغالاة ومصرين عالاحتفال بالشكل المعتاد

-الكنايس الكاثوليكية المسئولة معظمها رافض يفصح عن الوثائق الارشيفية اللى هتساعد العائلات تتعرف على أسماء وأماكن دفن الأطفال اللى ماتت. كتير من الأطفال مكنوش بيرجعوا لأهاليهم أبدا والأصل ان معظمهم كان بيتحرم من رؤية أهله بالشهور والسنين. العائلات اللى أولادهم عمرهم مارجعوا كانوا خايفين يكون اولادهم ماتوا فى المدارس دى بس مكنش حتى مسموح ليهم انهم يعرفوا مصاير ولادهم كان ايه. مؤخرا فيه كنيسة واحدة فى مقاطعة بريتيش كولومبيا أعلنت انها أخيرا هتفصح عن الوثائق عشان الأهالى يعرفوا معلومات اكتر عن مصاير ولادهم. 

-البابا فرانسيس اتهرب من الاعتذار عن الجريمة اللى ارتكبت باسم الكاثوليكية وكتب تويتة مشينة بدل ما يعتذر نتج عنها انتقادات كتير من تيارات وأفراد كتير فى كندا بما فيهم كاثوليكيين كنديين

-(الغرض من البوست ده ملوش علاقة بأى مزايدات دينية أو اعتبار ان فيه دين أسوأ أو أحسن من أديان أخرى، الغرض نقد استخدام الدين أيا كان و السلطة الدينية أيا كانت فى ظلم الناس او اضطهادهم بحجة ان فيه دين احسن وأكتر "تحضرا" من التانى)